《期限》
Backpacker 首要原則，除左好虛無既一堆夢想、勇氣、衝動之外，come on James ，到最後要識得死慳死抵先係王道。一直覺得一班自稱backpacker既旅人，或者只係一班瘋人院走出黎既自虐狂。而我卻固執地認為，只有走過最壞最壞，才有資格享受最好最好。
今次唔講點做到日日食包，坐長途巴坐到傻先慳得果小小錢。其實作為一個港女，係旅途中真係會遇到好多好多引誘，而我講緊既當然係每一個地方獨有既手信。對於一個揹50Lbackpack，而每日都只有好有限budget既人黎講，買手信係一樣極度奢侈既事。而人總係愛念舊，既然愛意唔可以將富士山私有，或者你可以選擇一個鎖匙扣。
係阿根廷，又或者應該話去到南美，你無可能未食過Dulce De Leche(直釋Sweet of Milk) 你可以想像佢好似南美洲既Nutella，總之有左佢，成個星期食麵包都完全唔係問題。而係阿根廷最受歡迎既零食Alfajorse 中間就係夾住呢pat人間美食。
記得第一次食Alfajorse 係岩岩到達Corrientes 既時候，一個黎自Columbia 既女仔請我食。果晚又凍又餓，著住佢硬塞比我既大羽絨，食住呢舊餅，人間有愛4個字出曬黎。自此，Alfajorse成為左我係阿根廷日食夜食既精神/肉體食糧（食一舊真心可以飽大半日），臨走既時候為左用盡所有peso重買左3盒反香港，幻想就算返到石屎森林之後，每咬一啖都可以好似坐時光機，帶我重遊阿根廷既夢幻時光。
而事實係到左一年後既今日，果盒原封不動既Alfajorse仍然好優雅禁企係櫃頂每日俯瞰著我。你要知道，一個backpacker係旅程上買既手信係好珍貴好珍貴，買完唔捨得食係一件好正常既事。然而我今日一睇，原來已經過左期半年有多。但望住呢盒曾經當係寶既Alfajorse，總係有點兒唔甘心就此將佢遺棄。於是我膽粗粗食左一啖，而最後既結論係what happens in Argentina stays in Argentina. 我又何必破壞佢當時係我心目中既印象呢。
學王家衛話齋，連保鮮紙都會過期，呢個世界應該無乜野唔會過期。其實簡單黎講成件事就只係一場錯配，我錯過左你最美艷既盛放，你浪費左我自以為浪漫既等待，或者根本無咩值得傷春悲秋。
Search